2024-yilda dunyo boʻylab Prezidentlik va vakillik organlariga oʻtkaziladigan saylov va referendumlar
2024-yilda 64 ta davlatda prezidentlik va parlament saylovlari oʻtkazilishi kutilmoqda.
Saylovlar oʻtkazilishi rejalashtirilgan davlatlarning aholisi umumiy hisobda 4 milliardga yaqin kishini tashkil etadi (dunyo aholisining yarmi). Ekspert hisob-kitoblariga koʻra, ovoz berishda 2 milliarddan ortiq saylovchi ishtirok etadi.
Davlat rahbarlari va parlament aʼzolarini saylash uchun eng koʻp saylovlar Yevropa mintaqasida rejalashtirilgan boʻlib, ovoz berish kamida 20 ta mamlakatda boʻlib oʻtadi. Undan keyin Afrika (18 ta davlat), Osiyo (16), Amerika (7) va Okeaniya (4) mintaqalari joy olgan.
30 ga yaqin davlat allaqachon saylovlar tashkil etilishini tasdiqlagan va ovoz berish kunlarini belgilagan boʻlsa, qolganlarida sanalar aniqlanmoqda. Maʼlumki, kamida 12 ta mamlakatda davlat rahbari va parlament saylovlari bir kunda boʻlib oʻtadi.
Bundan tashqari, 2024-yilda Yevropa parlamenti tarkibi yangilanishi kerak boʻlib, uning deputatlari Yevropa Ittifoqiga aʼzo boʻlgan mamlakatlar aholisi tomonidan saylanadi.
Jumladan:
- Osiyo mintaqasida parlament saylovlari 12 ta, prezidentlik saylovlari 2 ta hamda bir kunda oʻtkaziladigan parlament va prezidentlik saylovlari 2 ta mamlakatda;
- Yevropa mintaqasida parlament saylovlari 11 ta, prezidentlik saylovlari 8 ta hamda bir kunda oʻtkaziladigan parlament va prezidentlik saylovlari 1 ta mamlakatda;
- Amerika mintaqasida prezidentlik saylovlari 1 ta hamda bir kunda oʻtkaziladigan parlament va prezidentlik saylovlari 6 ta mamlakatda;
- Afrika mintaqasida parlament saylovlari 5 ta, prezidentlik saylovlari 7 ta hamda bir kunda oʻtkaziladigan parlament va prezidentlik saylovlari 6 ta mamlakatda;
- Okeaniyada parlament saylovlari 2 ta hamda bir kunda oʻtkaziladigan parlament va prezidentlik saylovlari 2 ta mamlakatda boʻlib oʻtishi rejalashtirilgan.
Hujjatni toʻliq shakli bilan ushbu havola orqali tanishing.
Demokratik jarayonlarni tahlil qilish markazi
