Demokratik taraqqiyot yoʻlida hamkorlik
Surxondaryo viloyatida Demokratik jarayonlarni tahlil qilish markazining hududiy boʻlinmasi tomonidan “Yangi Oʻzbekiston – fuqarolik jamiyati institutlarini izchil rivojlantirish” mavzusida davra suhbati tashkil etildi. Tadbirda nodavlat notijorat tashkilotlari (NNT), fuqarolik jamiyati institutlari vakillari, huquqshunoslar, ekspertlar va davlat organlari mutasaddilari ishtirok etdilar.
Davra suhbatida “Milliy tiklanish” demokratik partiyasi deputatlari tashabbusi bilan ishlab chiqilgan “Oʻzbekiston Respublikasining ayrim qonun hujjatlariga qoʻshimcha va oʻzgartirishlar kiritish toʻgʻrisida”gi qonun loyihasi muhokama qilindi.
Mutaxassislar ushbu hujjatning mazmun-mohiyati va uning mamlakatimiz ijtimoiy-iqtisodiy rivojlanishidagi ahamiyati haqida maʼlumot berib, qonun loyihasini targʻib etishda jamoatchilikning faol ishtiroki muhim ekanligini taʼkidlashdi. Shu bilan birga, NNT va fuqarolik jamiyati institutlari mazkur islohotlarni amalga oshirishda muhim rol oʻynashi mumkinligi qayd etildi.
Tadbir ishtirokchilari davlat va fuqarolik jamiyati institutlari oʻrtasidagi hamkorlik mexanizmlarini takomillashtirish masalalariga alohida eʼtibor qaratdilar. Xususan, bugungi kunda jamiyat rivoji va aholi farovonligini taʼminlashda NNTlarning faolligini oshirish, ularni huquqiy va moliyaviy jihatdan qoʻllab-quvvatlash dolzarb ekani taʼkidlandi.
Shuningdek, huquqiy mexanizmlarni takomillashtirish va fuqarolik jamiyati institutlari faoliyatini qoʻllab-quvvatlash boʻyicha davlat organlari va jamoat tashkilotlarining hamkorligini kuchaytirish zarurligi qayd etildi.
Tadbir yakunida ishtirokchilar tomonidan jamiyatda huquqiy madaniyatni yanada yuksaltirish, fuqarolarning qonun ijodkorligi jarayonlarida faol ishtirokini taʼminlash va jamoatchilik nazorati mexanizmlarini rivojlantirish boʻyicha takliflar ishlab chiqildi.
Shu bilan birga, davlat va NNTlar oʻrtasidagi samarali muloqotni davom ettirish, fuqarolik jamiyati institutlari faoliyatini takomillashtirishga qaratilgan qonunchilik tashabbuslarini qoʻllab-quvvatlash masalalari yuzasidan hamkorlikni yanada mustahkamlash muhimligiga urgʻu berildi.
Yangi Oʻzbekistonni barpo etish yoʻlida davlat, jamoat tashkilotlari va fuqarolik jamiyati vakillarining oʻzaro hamkorligi mamlakatimiz demokratik taraqqiyotida muhim oʻrin tutadi.
Demokratik jarayonlarni tahlil qilish markazi
Surxondaryo viloyati hududiy boʻlinmasi