Global nogironlar sammiti – 2025: Inklyuziv jamiyat sari qadam

2-3-aprel kunlari Germaniyaning Berlin shahrida nogironligi boʻlgan shaxslarning huquqlari va ijtimoiy integratsiyasini mustahkamlashga qaratilgan “Global nogironlar sammiti – 2025” boʻlib oʻtmoqda. Ushbu nufuzli xalqaro tadbir nogironlar huquqlarini himoya qilish, ijtimoiy tenglikni taʼminlash va inklyuziv jamiyat qurish yoʻlidagi eng muhim tashabbuslardan biri hisoblanadi.

Sammitda xalqaro tashkilotlar, fuqarolik jamiyati instituti vakillari, nogironlar tashkilotlari va xususiy sektor vakillari ishtirok etmoqda. Ularning asosiy maqsadi — nogironlarning huquqlarini jahon miqyosida ilgari surish va BMTning Nogironlar huquqlari toʻgʻrisidagi konvensiyasini (CRPD) amalga oshirishni qoʻllab-quvvatlashdan iborat.

Sammit doirasida nogironligi boʻlgan shaxslarning jamiyatda toʻlaqonli ishtirokini taʼminlash va ular uchun teng imkoniyatlar yaratish masalalari muhokama qilinadi. Xususan, nogironlar uchun qulay muhit va ijtimoiy integratsiyani taʼminlash, sogʻliqni saqlash va mehnat bozorida imkoniyatlarni oshirish, hukumat va NNTlar hamkorligini kuchaytirish va stereotiplar va diskriminatsiyaga qarshi kurashish shular jumlasidandir.

Sammit yakunlariga koʻra, “Amman-Berlin deklaratsiyasi” qabul qilinishi kutilmoqda. Bu hujjat nogironlarning jamiyatda toʻlaqonli ishtirok etishi va teng imkoniyatlarga ega boʻlishi uchun xalqaro miqyosda muhim qadam boʻladi.

Sammitda Oʻzbekistondan Nodavlat notijorat tashkilotlari vakillari ishtirok etmoqda. Ular tomonidan xalqaro tajribani oʻrganib, mamlakatimizda nogironlar huquqlari va ijtimoiy integratsiyasini mustahkamlashga qaratilgan yangi tashabbuslar ishlab chiqishni maqsad qilingan.

Demokratik jarayonlarni tahlil qilish markazi