Ўзбекистоннинг Париждаги элчихонасида Сорбонна университети профессори, эксперт Жан-Антуан Дюпра билан учрашув ташкил этилди
Мазкур учрашувда делегация раҳбари А.Пардаев томонидан Ўзбекистонда амалга оширилаётган демократик ислоҳотлар, фуқаролик жамияти институтларини қўллаб-қувватлаш ҳамда Ўзбекистон-Франция ўртасидаги стратегик шериклик тўғрисида фикр билдирди. Шунингдек, мамлакатимиз раҳбарининг Францияга ташрифи натижаси сифатида Ўзбекистон ва Франция фуқаролик жамияти институтлари вакилларининг ҳамкорлигини янги босқичга кўтариш лозимлигини таъкидлади.
Франциялик эксперт томонидан сўнгги йилларда Ўзбекистонда амалга оширилаётган кенг кўламли ислоҳотлар ва уларнинг натижалари алоҳида эътироф этилди. Жумладан, демократик ислоҳотлар, либераллаштириш, қонун ижодкорлиги борасидаги ўзгаришлар ижобий баҳоланди. Шунингдек, қонунчилик жараёнлари, конституциявий ислоҳотлар ҳамда бошқа бир қатор мавзуларда Франция тажрибаси ҳақида маълумотлар берилди. Шуниси аҳамиятлики, эксперт томонидан Ўзбекистоннинг самарали кўп векторли ташқи сиёсати бугунги кундаги ўта мураккаб бўлган геосиёсий жараёнда тўғри ва узоқни кўзлаб олиб борилаётганлиги алоҳида таъкидланди.
Яна бир муҳим жиҳати шундаки, Ўзбекистон дунёда юз бераётган можаролар фонида ўзининг прагматик ва “нейтрал” ташқи сиёсати билан бошқа кўплаб мамлакатларга ўрнак бўладиган даражада натижаларга эриша олганлиги, шунингдек, қўшни мамлакатлар билан дўстона муносабатларнинг ривожлантирилиши минтақавий ташқи сиёсатда Ўзбекистоннинг мавқеини оширганлиги таъкидланди. Шу жараёнда эксперт томонидан Марказий Осиё мамлакатлари учун минтақавий сиёсатни юритишда Европа Иттифоқидан андоза олиш лозимлиги таклиф этилди.
Учрашув сўнггида ўзаро самарали мулоқотни давом эттириш, демократлаштириш, қонун ижодкорлиги ҳамда бошқа мавзуларда ҳамкорликни мустаҳкамлашга келишиб олинди.