Мустақиллик йилларида фуқаролик жамияти институтларини ривожлантириш тенденциялари муҳокама этилди
Жорий йилнинг 22 август куни Демократик жараёнларни таҳлил қилиш марказининг Андижон вилояти ҳудудий бўлинмаси томонидан “Ватан учун, миллат учун, халқ учун!” шиори остида “Мустақиллик йилларида очиқ фуқаролик жамияти ва ОАВ фаолиятини янада ривожлантиришда ўзаро ҳамкорликнинг долзарб масалалари” мавзусида давра суҳбати ўтказилди.
Тадбир Андижон вилояти ҳокимлиги ҳамда Ўзбекистон нодавлат нотижорат ташкилотлари миллий ассоциациясининг вилоят ҳудудий бўлинмаси ҳамкорлигида ташкил этилди.
Давра суҳбатида Андижон вилояти ҳокимлиги вакиллари, нодавлат нотижорат ташкилотлари, фуқаролик жамиятининг бошқа институтлари ҳамда оммавий ахборот воситалари вакиллари иштирок этдилар.
Тадбир Олий Мажлис ҳузуридаги Жамоат фонди субсидия маблағлари доирасида ўтказилди. Унинг асосий мақсади – мустақиллик йилларида ННТлар, ОАВ ва фуқаролик жамиятининг бошқа институтларини шакллантириш ва ривожлантириш борасида амалга оширилган ишлар юзасидан атрофлича таҳлил ўтказиш, Янги Ўзбекистон шароитида уларнинг фаолияти самарадорлигини ошириш ҳамда янада такомиллаштириш масалаларини муҳокама қилиш, шунингдек, соҳада амалий таклиф ва тавсиялар ишлаб чиқишдан иборат бўлди.
Таъкидланганидек, Ўзбекистон мустақилликка эришганидан буён ижтимоий демократик давлат ва очиқ фуқаролик жамиятини барпо этиш йўлида кенг кўламли ислоҳотлар амалга оширилди. Шунингдек, очиқ фуқаролик жамиятининг ҳуқуқий пойдеворини мустаҳкамлаш мақсадида 200 дан ортиқ қонун ва қонуности ҳужжатлари қабул қилиниб, соҳанинг ҳуқуқий механизмлари такомиллаштириб борилмоқда.
Суҳбатда мустақиллик йилларида амалга оширилган ислоҳотлар натижасида ННТларни давлат рўйхатидан ўтказиш тартиби соддалаштирилгани, улар фаолиятига ортиқча аралашувларнинг чеклангани, давлат томонидан субсидиялар, грантлар ва ижтимоий буюртмалар ажратиш орқали молиявий қўллаб-қувватлаш тизимининг шаффофлиги таъминланаётгани қайд этилди.
Бугунги кунда Андижон вилоятида 600 дан зиёд жамоат ташкилоти ва 30 га яқин босма ҳамда электрон ОАВ фуқароларнинг ҳуқуқий саводхонлигини оширишдан тортиб, экологик муаммоларни ҳал этиш, ижтимоий ҳимояга муҳтож қатламларни қўллаб-қувватлаш каби йўналишларда фаолият олиб бормоқда.
Давра суҳбати якунида ННТ ва ОАВ ўртасидаги ҳамкорликни янада кучайтириш, фуқаролик жамиятини ривожлантириш Концепциясида белгиланган вазифаларни изчил ва самарали амалга ошириш бўйича таклифлар илгари сурилди.
Андижон вилояти ҳудудий бўлинмаси